Сырдария жастары сайлауда белсенді болуға үндеді
- 39 views
Президент сайлауын мерзімінен бұрын өткізу қазақстандық қоғам үшін қажетті қадам. Осы орайда "Сырдария" университетінде Жастар бөлімі мен студенттер бірігіп, "Жастар және сайлау" атты конференция өткізді. Жиынға Оқу-әдістемелік басқарма бөлімінің басшысы, доцент, саясаттану ғылымдарының кандидаты Рая Тәжітаева мен алғаш рет сайлауға дауыс беретін университетіміздің студент-жастары қатысты.
Аталған шараның мақсаты — жастардың сайлау туралы түсінігін қалыптастыру, білім беру мен ақпараттық технологиялар арқылы болашақ жас сайлаушылардың демократиялық үдерістерге қатысуына ықпал ету. Сондай-ақ, сайлаудың қоғам мен жеке адам үшін маңыздылығын саралау.
Жиында Рая Сейілқызы жастар елдің болашағы екенін айтып, олар Отан және ата-ана алдындағы жауапкершілігін сезіне отырып өткізілетін сайлауларға белсене қатысуы керектігін жеткізді. Сайлау тарихы мен маңыздылығына да тоқталып өтті.
Жастар бөлімінің басшысы Бектеміс Мейірхан: "Алда өте жауапты кезең – сайлау келе жатыр. Бұл кезекті сайлау ел болашағын ойлау болып табылады. Сайлаудың маңыздылығы еліміздің ертеңгі болашағында деп білемін. Сырдария жастары сайлауға қатысады және белсенділік танытамыз деп сеніммен айта аламын" - деді.