Бізде қонақта

Университетімізде Шымкент қаласының ішкі саясат және жастар істері жөніндегі басқармасының «Тарихтан тағылым» тақырыбындағы әлеуметтік жобасы аясында кездесу болып өтті. Оған тарих және география, филология, дене тәрбиесі және спорт мамандықтары бойынша блім алып жүрген студент жастар қатысты.
Әлеуметтік жоба барысында бірқатар тарихшы ұстаздар осы уақытқа дейін бірнеше жоғары оқу орындары мен колледждерде болып, дәріс оқыған. Басқосуларда Қазыбек биге - 355жыл, Дулат Бабатайұлына –220 жыл және мемлекет және қоғам қайраткерлері Дінмұхамед Қонаевтың 110, Аасанбай Асқаровтың 100 жылдық мерейтойларына орай, біртуар азаматтар жайлы олардың өмір жолы, атқарған жұмыстары және жас ұрпаққа қалдырған өлшеусіз еңбектері туралы сөз қозғалған.
Жоба ұйымдастырушылары ұлтымыздың ұлт болып ұйысуына, еліміздің өркендеуі жолында ойып алар орны бар тұлғаларды, көшбасшыларды дәріптеу, олар туралы жас ұрпаққа тереңірек жеткізіп, санада жаңғырту мақсатында бұл жолы Ж. Ташенев университеті студенттеріне Ахмет Байтұрсыновтың 150 жылдығына орай ағартушының өмірі жайлы дәріс оқыды. ОҚМПУ доценті, тарих ғылымдарының кандидаты Эльмира Мырзалиева «Ұлт ұстазы Ахмет Байтұрсынұлы» тақырыбы аясында қоғам қайраткерінің қазақ балаларының сауатын ашу жолындағы көзсіз ерліктерін, ағарту жолындағы соқтықпалы соқпалы өмірін, қиындықтарын баяндап берді. Тар заманда басын бәйгеге тігіп, ұлтына еткен еңбегі, ең алғаш рет «Әліппе» оқулығын алып келуі де сөз болды. Әсерлі өткен басқосуда университетіміздің студенттері де тақырыпқа белсенділік танытып, пікір алмасып отырды.