ТӘШЕНОВТЫҢ ТУҒАНЫНА 110 ЖЫЛ

«Маған керегі лауазым емес, қазақ халқының бірлігі мен жерінің тұтастығы. Ол арманыма жеттім. Елім, жерім орнында» деген тау тұлғалы Жұмабек Тәшеновтің туғанына 110 жыл. Ол өз заманында қазақ елі үшін маңызды шешімдерді қабылдаған, қара басын емес елдің қамын ойлаған азамат. Бүгінде елдің тұтастығы мен халықтың бейбіт күнде өмір сүретінін білсек, оның артында Тәшеновтей жандардың ерлігі жатыр. Қазіргі қоғам осы тұлғалардың ерлігін білер ме екен?! Дәл осы сұраққа жауап ретінде Шымкент қаласында Республикалық ғылыми конференция өтті.

Жиынға қала әкімінің орынбасары Сәрсен Құранбек, «Тұран» университетінің президенті Рахман Алшанов, ҚР дипломатиялық қызметінің еңбек сіңірген қызметкері ЗауытбекТұрысбеков, кәсіпкер, меценат Серікжан Сейтжанов қатысты. Конференция барысында Жұмабек Тәшеневтің тарихи тұлғасы, оның саясаттағы орны, реформаторлық көзқарастары талқыланды. Спикерлер баяндама жасап, тың ақпараттармен бөлісті. Мәселен, ҚР Ардагерлер ұйымының төралқа мүшесі, заң ғылымдарының докторы Бекет Тұрғараев «Ұлт батыры, ұлы тұлға – Жұмабек Тәшенев» атты баяндамасында қайраткердің елдік мүдде жолындағы атқарған жұмыстарын атап өтті.

- 1950 жылдың аяғында Кеңес одағының басшылығына Никита Сергеевич Хрущев келді. Оған Қазақстанның жері үлкен көрініп, оны шағын ету керек деген мақсатта республиканың солтүстігіндегі 5 аймақты Ресей Федерациясының құрамына бермек болады. Ал елдің батысындағы қазіргі Маңғыстау түбегін түгел Түрікменстанға бермек болған. Ал оңтүстікте бірнеше ауданды Өзбекстанға беру жөнінде үлкен жоспар жасалған. Осы мәселені шешуге Жұмабек Тәшенов кірісті. Ол одақ басшылығына жер аумақтарын бөлу туралы мәселені жергілікті билікпен санаспай, тікелей Мәскеуде орталық комитетте шеше берер болсақ, онда Кеңес Одағының конституциясын, Қазақ КСР конституциясын жою керек екенін айтқан. Ал оны жоймайтын болсақ, заңда мына аумақтың бәрі Қазақстанның меншігі екені жазылған деген уәж айтып, Хрущевтің бетін қайтарған,-деді ол.