TASHENEV UNIVERSITY-ДЕ БІЛІМ БЕРУ БАҒДАРЛАМАЛАРЫНЫҢ ХАЛЫҚАРАЛЫҚ АККРЕДИТАЦИЯСЫ ӨТУДЕ

Tashenev University-де Білім берудегі сапаны қамтамасыз ету жөніндегі тәуелсіз агенттіктің (IQAA) сарапшылар тобы өз жұмысын бастады. Сарапшылардың сапары университеттің бірден 15 білім беру бағдарламасын халықаралық мамандандырылған аккредитациядан өткізу рәсімінің аясында жүзеге асырылуда.

Бірнеше күн бойы сарапшылар университет қызметінің түрлі бағыттарын жан-жақты бағалайды: білім беру бағдарламаларының мазмұны мен сапасын, университеттің миссиясы мен даму стратегиясын, академиялық саясат пен студенттерді қолдау жүйесін, сондай-ақ ішкі сапаны қамтамасыз ету жүйесінің тиімділігін талдайды. Ерекше назар университеттің жұмыс берушілермен және түлектермен өзара байланысына аударылады — олар оқу үдерісінің маңызды қатысушылары болып табылады.

Аккредитация барысында сарапшылар тобы университет басшылығымен, профессорлық-оқытушылық құраммен, студенттермен, түлектермен және әлеуметтік серіктестермен кездесулер өткізуде. Бұл кездесулерде білім беру бағдарламаларының еңбек нарығындағы өзектілігі, оқу жоспарларының мазмұны және студенттердің тәжірибелік дайындығының сапасы талқыланады.

Университеттің академиялық мәселелер жөніндегі проректоры Парида Байнеева аккредитацияның маңыздылығын атап өтті:

«Халықаралық аккредитациядан өту — білім сапасын арттыру жолындағы маңызды қадам. Бұл бізге өз жұмысымызға сырт көзбен қарауға, күшті және жетілдіруді қажет ететін тұстарды анықтауға мүмкіндік береді. Біз Tashenev University-дегі әрбір білім беру бағдарламасы халықаралық стандарттарға сай болып, түлектеріміздің Қазақстанда да, шетелде де бәсекеге қабілетті болуына ұмтыламыз».

IQAA аккредитациясы университеттің білім беру үдерісін үнемі жетілдіруге, ашықтық пен айқындық қағидаттарын ұстануға деген ұмтылысын айқындайды. Сарапшылар тобының жұмысының нәтижелері білім сапасын одан әрі арттыру мен Tashenev University-дің ұлттық және халықаралық білім беру кеңістігіндегі беделін нығайтуға негіз болады.