Пікірсайыс турнирі

Жұмабек Тәшенев университетінде ағылшын тіліндегі пікірсайыс турнирі өтуде!
Бүгін университет қабырғасында студенттердің білімін, шешендік өнерін және логикалық ойлау қабілетін сынайтын ерекше оқиға – ағылшын тіліндегі пікірсайыс турнирі өтуде. Бұл турнир болашақ көшбасшыларды дайындауға, олардың сыни ойлау қабілеттерін шыңдауға және халықаралық деңгейдегі пікірталастарға дайындауға бағытталған.
Турнирге 4 команда, әрқайсысында 3 студенттен қатысып отыр. Қатысушылар өз білімдерін тексеріп қана қоймай, маңызды әлеуметтік және ғылыми мәселелерді талқылап, шешендік қабілеттерін шыңдайды. Биылғы жарыстың басты тақырыбы – «Жасанды интеллект қандай да бір мамандықты алмастыра ала ма?».
Қатысушылар үш кезеңнен тұратын пікірсайыс форматында бақ сынауда. Бірінші кезең – викторина, мұнда студенттердің білім деңгейі мен жылдам ойлау қабілеті сыналады. Екінші кезең – аргументтер сайысы, онда әр команда өз ұстанымын дәлелдеп, дәйекті деректер келтіреді. Соңғы кезең – кросс-сұрақтар, мұнда командалар қарсыластарының пікіріне қарсы сұрақтар қойып, олардың логикасын тексереді.
Жарыстағы негізгі бағалау критерийлері мыналар:
Аргументация – пікірді дәлелдермен негіздеу;
Контраргументация – қарсы тараптың аргументтерін жоққа шығару қабілеті;
Ораторлық шеберлік – сөз мәнері, дауыс ырғағы, аудиторияны баурап алу;
Құрылым – ойдың жүйелілігі мен логикалық реті;
Командалық жұмыс – топтық үйлесімділік және өзара әрекеттесу.
Сондай-ақ, ерекше әрі тың идеялар ұсынған командаға қосымша 5 балл беріледі.

Турнирді бағалайтын қазылар алқасы құрамында беделді мамандар бар:

• Кэтрин Рик – Tашкенттегі British Management University кәсіби даму бөлімінің жетекшісі, университетіміздің серіктесі;
• Ирметов Ұтқыр Абдрасұлұлы – педагогика ғылымдарының кандидаты, доцент;
• Мырзагалиқова Сауле Тәжібайқызы – ағылшын тілі кафедрасының аға оқытушысы.

Кэтрин Риктің пікірінше, пікірсайыс студенттердің ойлау қабілетін дамытуда және мансаптық жетістіктерге жетуінде ерекше рөл атқарады:
"Батыс тәжірибесі көрсеткендей, пікірсайыс тек интеллектуалды ойын емес – бұл өз ойыңды еркін жеткізуге, көшбасшылық қабілеттеріңді дамытуға және табысқа жетуге мүмкіндік беретін қуатты әлеуметтік лифт. Осындай турнирлер студенттерге болашақта халықаралық аренада бәсекеге қабілетті болуға көмектеседі!"
Пікірсайысқа қатысушы студенттердің бірі Муратбаев Жавохир өз әсерімен бөлісті:
"Бұл турнир маған өз көзқарасымды нақты дәлелдермен қорғауға, қарсы тараптың аргументтеріне жауап беруге және командалық жұмысты жетілдіруге көмектесті. Осындай пікірсайыстар тек білімді ғана емес, сонымен қатар шешендік шеберлікті дамытады!"
Жарысты ұйымдастыруда Tashenov Union студенттік клубының үлесі зор. Tashenov Union – Жұмабек Тәшенов университетінің прогрессивті және белсенді студенттерін біріктіретін ұйым. Клубтың басты мақсаты – студенттерге жаңа мүмкіндіктер ашып, оларды шығармашылық және зияткерлік тұрғыда дамыту. Қазіргі таңда клуб құрамында 40-тан астам белсенді студент бар.

Tashenov Union төрт негізгі бағытта жұмыс істейді:
Ғылыми-зерттеу – білім мен ғылымды дамытуға арналған жобалар;
Қайырымдылық – әлеуметтік жобалар мен еріктілік қызметі;
Спорттық іс-шаралар – белсенді өмір салтын насихаттау;
PR және медиа – университет имиджін қалыптастыру және студенттік жобаларды ілгерілету.
«Дебаттар: болашақ білім беру» – клубтың маңызды жобаларының бірі. Бұл жоба арқылы студенттер пікірсайыс өнерін меңгеріп, аналитикалық ойлау мен шешендік қабілеттерін дамыта алады.
Осындай іс-шаралар студенттердің білімін кеңейтіп қана қоймай, олардың көшбасшылық дағдыларын дамытуға, шетелдік сарапшылармен байланыс орнатуға және өз ойын еркін жеткізуге мүмкіндік береді.
Көшбасшылық пікірден басталады! Барлық қатысушыларға сәттілік тілейміз!

P.S. Жеңімпаздар:
1-орын: Team 2 – Алибек Аружан, Маккамова Роза, Халила Диана
2-орын: Team 4 – Мусаходжаева Машхура, Рахматуллаева Айгерим, Муратбаев Жавохир
3-орын: Team 1 – Сарсенбаева Айдана, Оспан Нұрмұхаммед, Илёсова Ферузабану
4-орын: Team 3 – Нарходжаева Шахзода, Сайдахматова Шахзода, Датқабек Ақерке