БАЛАЛАРДЫ ЗОРЛЫҚ-ЗОМБЫЛЫҚТАН ҚАЛАЙ ҚОРҒАУҒА БОЛАДЫ?

ЖҰМАБЕК ТӘШЕНЕВ УНИВЕРСИТЕТІНДЕ МАҢЫЗДЫ МӘСЕЛЕ ТАЛҚЫЛАНДЫ
Шымкентте балаларға қатысты зорлық-зомбылықтың алдын алу және онымен күресу мәселелеріне арналған ғылыми семинар өтті. Іс-шараға студенттер, оқытушылар, психологтар, ювеналды полиция өкілдері, қоғамдық ұйымдар мен шақырылған сарапшылар қатысты. Кездесудің басты мақсаты — кәмелетке толмағандарды қорғаудың тиімді шараларын талқылау және зорлық-зомбылыққа мүлде төзбеушілік мәдениетін қалыптастыру.
Қазіргі балалар мен жасөспірімдер цифрлық технологиялар дәуірінде өмір сүруде, алайда ақпаратқа кең қолжетімділік олардың қауіпсіздігін әрдайым толық қамтамасыз ете бермейді. 
Жумабек Ташенов атындағы университеттің әлеуметтік-мәдени даму жөніндегі проректоры Ғалымжан Битұрсынның айтуынша, балаларды құқықтық қорғаумен қатар, оларды өзін-өзі қорғау дағдыларына үйрету де маңызды:
«Бүгінгі жастар цифрлық технологиялар дәуірінде өмір сүріп жатыр, бірақ, өкінішке қарай, бұл оларды зорлық-зомбылықтан толық қорғай алмайды. Әрбір адам күрделі жағдайларда қалай әрекет ету керектігін және көмекке қайда жүгінуге болатынын білуі керек. Сонымен қатар, көптеген жастар өз құқықтарын ғана емес, Конституция мен заң алдындағы міндеттерін де білмейді. Әрбір азаматтың құқықтарымен қатар, белгілі бір міндеттер де жүктелетінін ұмытпау қажет».
Әл-Фараби атындағы Қазақ ұлттық университетінің профессоры Гүлзағира Атаханова құқықтық тетіктер бұл мәселені шешудің бір ғана бөлігі екенін атап өтті:
«Көп жағдайда құрбандар көлеңкеде қалады. Біз балалар өздерін қауіпсіз сезініп, олардың дауысы естілетін жүйе құруымыз керек. Заң — бұл құрал, бірақ ең бастысы — қоғамдық сана өзгеруі қажет».
Семинар аясында педагог-психолог, педагогика ғылымдарының магистрі Г.И. Амандикованың «Зорлық-зомбылықсыз балалық шақ» тренингі өтті. Қатысушылар шынайы өмірлік жағдайларды талдап, қауіп-қатер белгілерін анықтауды және зорлық-зомбылық көріністеріне дұрыс жауап беруді үйренді.
Семинарда кәмелетке толмағандар арасындағы қылмыстың алдын алу, зорлық-зомбылықтың қылмыстық-құқықтық және криминологиялық аспектілері, сондай-ақ сот сараптамасының рөлі мәселелері талқыланды. Сонымен қатар, балалар мен жасөспірімдердің құқықтық сауаттылығын арттыру бойынша шараларға ерекше назар аударылды.
Іс-шараның ең есте қаларлық сәттерінің бірі «Ашық микрофон» алаңы болды. Студенттер өз оқиғаларымен бөлісіп, сарапшыларға сұрақтар қойып, өзекті мәселелерді талқылады.
«Бей-жай қалуға болмайды. Кез келген адамның өмірінде көмек пен қолдау қажет болатын жағдайлар туындауы мүмкін. Ең бастысы — қалай әрекет ету керектігін білу. Біз әділетті қоғамды қалыптастыруымыз керек», — деді қатысушылардың бірі.
Семинар зорлық-зомбылықтың алдын алу және оны болдырмау жолдары туралы ақпараттандырудың маңызды қадамы болды. Ұйымдастырушылар мұндай кездесулер студенттердің кәсіби біліктілігін арттырып қана қоймай, олардың азаматтық ұстанымын қалыптастыруға ықпал ететініне сенім білдірді.
Сондай-ақ, қатысушылар құқық қорғау органдарымен, психологтармен және әлеуметтік қызметтермен одан әрі ынтымақтастық орнатуға, балалардың құқықтарын қорғау мәселелері бойынша жаңа білім беру бағдарламаларын әзірлеуге келісті.
Осындай бастамалар әрбір баланың өзін қауіпсіз сезінуіне және өз құқықтарының қорғалатынына сенімді болуына мүмкіндік береді.